NOTA INFORMATIVA DA PLATAFORMA POLA DEFENSA DAS NOSAS ÁRBORES SOBRE RISCO DE ELECTROCUCIÓN NO PARQUE INFANTIL DE RIBADEO
O pasado martes, 24 de febreiro, sobre as 13 horas, un membro desta plataforma observou que tres pícaros estaban agachados xunto dun portelo aberto na base do quiosco da música e que xa ían meter a man nunha instalación eléctrica con diversos elementos e cables espidos, seguramente para a iluminación do quiosco ou outros elementos eléctricos da zona. Inmediatamente avisou aos pais para que vixiaran aos cativos, pechou a portiña e chamou por teléfono á policía municipal, que amablemente tomou nota e dixo que xa avisaba a quen correspondese. O tema comentouse no noso chat, pero como demos por suposto que o concello actuaría inmediatamente non fixemos nada por divulgar o que podería ser un fallo humano sen máis. Pero hoxe venres 27, ás dez trinta da mañá, dando por suposto que o fallo estaría resolto fomos comprobalo e puidemos constatar que a portiña sigue coa pechadura pasada pero sen cerrar de chave, o cal significa que un cativo ou calquera persoa pode abrila e meter a man coas correspondentes consecuencias, maiormente hoxe que choveu e hai humidade no terreo. Non imos facer comentario algún, porque non queremos ofender a intelixencia da persoa observadora, pero tres días sen amañar este risco real de electrocución demostra como funcionan algúns.
PLATAFORMA POLA DEFENSA DAS NOSAS ÁRBORES
Ribadeo, 27 de febrero de 2026, 11.26 h.
Unha resposta a “NOTA INFORMATIVA DA PLATAFORMA POLA DEFENSA DAS NOSAS ÁRBORES”
Aparte de non pechar a porta con risco inminente de electrocución, quen leva o mantemento desa instalacion tan sumamente cutre, sen hermeticidade, podrida e oxidada, que non cumple ningunha norma da tecnoloxía industrial de risco de accidentes??