Hai pouco atopei unha nova á que non se lle deu moita difusión: ‘Adif non recupera o perdido nunha obra en Asturias coa que Ence pagou menos impostos á Xunta‘. E viñéronme á cabeza as veces que me referín ó tema das actividades de Ence no porto de Ribadeo, as rebaixas de custes de Ence/rebaixas de ingresos dunha entidade tutelada de xeito público (Portos) como un chiringuito máis/manexo doutro chiringuito máis (Adif) e outros temas relacionados. A difusión da nova pola miña parte deu lugar a varias respostas. Con elas tento ampliar a noticia expoñendo as ideas dun xeito resumido, que poda servir como esquema xeral:
Portos de Galicia deixou de percibir varios millóns de euros entre 2011 e 2024 pola rebaixa de cotas a Ence. A rebaixa foi lograda por Ence ‘pola cara’ enfrontando chiringuitos de administracións diferentes (entra tamén o Porto de Xixón neste nivel). O longo parágrafo final do artigo https://blogs.amarinha.gal/ribadeando/2021/04/23/ria-de-ribadeo-pancho-campos-dorado/ fala algo disto.
Como cifras, o tren so pode carretar arredor de 1000 tm en cada viaxe polo tanto para cargar un barco de 4000 tn serian catro viaxes ida e volta. En camións de 20 tm, 200 camións. Chega a haber ata tres barcos en porto. Hai que contabilizar ancho de vía, posibilidade de cruce de convois, disponibilidade de persoal e material rodante, posible necesidade de nova estación de transferencia no Musel, etc. Consultar no artigo citado os gastos xa habidos para logo abandoar as obras…
O proxecto foi iniciado por Vicente Álvarez Areces, quen animou a ENCE como peón na loita que dende hai anos se ven fraguando arredor da ría de Ribadeo. Ence foi máis aló: viu o choio que lle podía supoñer o enfrontamento, que se pode resaltar coas verbas de Ignacio García Palacios, alcalde Navia do momento: ‘non deixemos que Ribadeo se lucre ca “nosa” celulosa’.
O proxecto para achegar Ence ó Musel por tren asinouse en Madrid, e a continuación os descontos das taxas portuarias para Ence en Ribadeo foron apoiados por todos os partidos representados no concello.
Distancia en liña recta Mirasol – Ence Navia: 27 km
Distancia en liña recta Musel – Ence Navia: 83 km
