A agulla no palleiro

Atopar unha nova que non sexa de política é, senón misión imposible, si alomenos moi dificultosa. A xeración de novas por parte de partidos e candidatos non deixa espazo, pero máis aínda, contamina o resto das novas. Polo momento, aparece sen contaminar en Ribadeo a celebración do concerto das letras galegas hoxe, coa lembranza de Hernán no fondo. Pero dende a acusación e réplica do enlace A8-N634 en Lourenzá ás idas e vidas, uso e abuso da Mancomunidade, pasando xa en Ribadeo da subestación eléctica (con planificación que se expoñerá despois das eleccións) á torre dos Moreno (máis pilastras, máis cartos…pero nada máis), todo está dirixido á próxima cita. E, en calquera dos casos anteriores, coido que falta información pública, tanto de acusadores como de acusados, porque as cousas plantéxanse así de cara ás eleccións: os bós, os malos. É dicir, a cidadanía, ó fondo, de espectadora, sen participación, esperando a mínima ventá do voto para ser, por un momento, cidadán.