Xa temos o resume do concello (a nota de prensa da alcaldía) sobre o pleno do luns.
Mentras, esperamos a Transgascogne, as duchas dos bloques xa están postas, acompañando ás de rocas brancas, o 25 de xullo hai percebada en Rinlo, hoxe recala en Ribadeo o congreso sobre Antonio Raimundo Ibáñez, … sen esquecer, a nivel mundial o que representou a toma da Bastilla, da que onte se fixeron 220 anos, ou a nivel Galicia de novo as tratoradas (que onte chegaron asemade a Ribadeo). En fin, quen queira seguir co tema cultural e festivo, ten noutra nota do concello de hai uns días temática abondo. Para esta semana en concreto, segundo o correo de difusión dos actos culturais, o de Ibáñez:
Programa de hoxe:
09.30 : O comercio de Ribadeo nos tempos de Ibáñez. Aingeru Zabala (Univ. de Deusto)
10.30 : A memoria perdida dos afrancesados galegos (1808-1810). X.R. Barreiro. (R.A.G)
12.00: Os homes de empresa e comercio : a chamada da terra . R. Villares (CCG)
13.00 : Debate
16.00 : Visita guiada ao porto e á parte vella de Ribadeo máis ligada ao comercio marítimo. (unha visita máis, que esta tempada estanse a prodigar)
O xoves ás 19.30 horas, no Cine Teatro , terá lugar o pregón das festas do Carme no que intervirá o grupo de clarinetes da EMMD.
… E “Incisións”: 26 gravados de artistas lucenses e as súas pranchas…unha exposición que non debedes deixar de ver comisariada por Ignacio López e organizada polo Museo Provincial de Lugo .
No forte San Damián, desde este venres, 17 de xullo , ao 17 de agosto.
De martes a domingo, de 11.30 a 13.30 horas, e de 18.00 a 21.00 horas.
Voltemos ó pleno, comezando por algo que a prensa non recolle polo momento, a contestación ás preguntas das asociacións. Como marchei algo despois das 11 da noite, cando quedaban tres persoas como público no salon de plenos, e a resposta por parte da alcaldía ou concelleiros implicados dase despois de rematar a acta do pleno, teño só unha aproximación á resposta ó Tesón (información que me pasaron), que poño a continuación (a resposta ás da Atalaia non ma pasaron):
1.Dado o crecente uso das novas tecnoloxías, os erros observados na información subministrada (tanto na web do concello como noutras que afectan a Ribadeo) e a necesidade de achegar administración e administrados, solicitamos coñecer o plan de desenvolvemento da web do concello, o protocolo de corrección de erros na información da mesma e os pasos que se teñen pensado da no futuro para a introducción na administración electrónica.
R: … poñeranse en marcha as cousas. Máis adiante. A lembrar que é unha resposta dada en abondas outras ocasións, a maioría delas sen ver aínda cando é ise ‘máis adiante’. Haberá que facer unha relación, pode que aproveitando que esta fin de semana é a asamblea de O Tesón.
2.Dado o tamaño e manufactura dos carteis correspondentes ó Plan E, mesmo para obras relativamente pequenas, solicitamos coñecer cal é o custe de cada un e o número deles instalado.
R: As dimensións veñen diseñadas polo goberno. O custo é de 1 300€. Páganos as empresas adxudicatarias, non o concello. … a ver, que era requerimento do goberno xa o sabiamos. Preguntabamos o prezo, pois 1 300€ por cartel son moitos euros multimplicados polas obras de Ribadeo (xa non digamos de toda España), e parece unha especie de re-tomadura do pelo. Certamente, non é cousa do goberno municipal ‘de primeiras’, pero si é cousa de toda a cidadanía ver en que se gastan os cartos de todos. Neste caso, gástanse en propaganda.
Ben, recomecemos o pleno. O punto primeiro, acta anterior, foi aprobado por unanimidade. Comezou o punto segundo, sobre facturas pagadas, sen a presenza inicial da interventora. Abondantes preguntas e respostas como preparando a máquina para o tema dos presupostos. E nesas preguntas e respostas sempre hai cousas curiosas. Por exemplo, que no concello a paga por produtividade repártese de xeito linear, algo que suscita o reparo da interventora e que coido que desvirtúa o seu sentido inicial. É algo que se fai así ‘dende sempre’. Ou os 2320€ do especial sobre Ribadeo na Voz de Galicia; algo que fan tódolos concellos para non quedarse atrás uns dos outros, pero do que un se pregunta a utilidade e non pode deixar de relacionar cos montós de periódicos que os venres están a disposición de quen os queira coller na 
entrada do concello (cousa rara que ninguén o relacionara no pleno), ou dos ‘Ribadeo Muller’ que aínda están á vista de todos, empaquetados, no gardarroupa do Hernán Naval (na foto)
O punto terceiro trataba do Xuíz de Paz. Parece que temos Xuíz de Paz suplente (coido lembrar que é Victor Manuel Sanjurjo Láncara, ‘Choupín’), pero non titular. O concello inhíbese por unanimidade e será designado direitamente polo TSXG.
No punto 4º, a petición a Paradores dun anaco de parcela (do aparcamento) de 38m2 para ampliar a calzada na zona da r/Alza, na zona que aparece na toma do sixpac. Algo que xa se pediu pero non obtivo resposta polo momento.
Os puntos 5 e 6 foron relativos á axuda no fogar. Un, a aprobación inicial do servizo, que se fixo coa abstención da UPRi, e outro, tamén con ela, a aprobación inicial do prezo. A continuación foi a aprobación do convenio de xantar na casa e o xantar sobre rodas, que parece que polo novo sistema da Xunta vai representar un menor custe para usuarios e tamén para concello. Iste punto foi aprobado por unanimidade, pero pediuse un seguemento, a parte da enquisa de satisfacción que xa hai, para asegurar o axeitado dos menús. O derradeiro punto antes do orzamento foi a aprobación dunha serie de licenzas de primeira ocupación, o que se fixo por unanimidade.
… queda o punto sobre os orzamentos…