{"id":6186,"date":"2016-05-06T08:25:00","date_gmt":"2016-05-06T06:25:00","guid":{"rendered":""},"modified":"2024-11-12T13:49:03","modified_gmt":"2024-11-12T12:49:03","slug":"o-fiouco-neboa-explicada-que-non-resolta","status":"publish","type":"post","link":"https:\/\/blogs.amarinha.gal\/ribadeando\/2016\/05\/06\/o-fiouco-neboa-explicada-que-non-resolta\/","title":{"rendered":"O Fiouco, n\u00e9boa explicada (que non resolta)"},"content":{"rendered":"

Avanzando a primavera, comezan a sentirse m\u00e1is os peches da A8 no Fiouco. Acadar\u00e1n o seu m\u00e1ximo cara a xu\u00f1o, e voltar\u00e1n descender en intensidade ata o m\u00ednimo invernal. \u00c9 unha predici\u00f3n doada, co\u00f1ecida de vello pola xente do lugar, explicada polo funcionamento de ventos e humidade e por se acaso, estudada nun costoso informe<\/a>, encargado a posteriori do desastre<\/a> a unha empresa balear especializada en meteorolox\u00eda<\/a> que corroborou unha media de d\u00faas horas diarias de n\u00e9boa intensa \u00f3 longo do ano (ver t\u00e1boa). Predici\u00f3n doada, soluci\u00f3n (agora) complicada<\/a>.<\/p>\n\n\n\n\n
<\/a><\/td>\n<\/tr>\n
Visibilidade preto do alto do Fiouco, segundo o estudo citado: en xu\u00f1o de 2015 houbo tanto tempo visibilidade inferior a 50 m como superior a 1000 m. E na \u00e9poca estudada (2014\/2015) houbo visibilidade menor de 50 m unha media de m\u00e1is de d\u00faas horas diarias.<\/td>\n<\/tr>\n<\/tbody>\n<\/table>\n

A explicaci\u00f3n que ten \u00e9 tan sinxela como a que explica o resultado dun experimento que podes facer agora mesmo: colle un vaso a temperatura ambiente, ach\u00e9gao \u00e1 boca e sinxelamente, expira. Ver\u00e1s como se condensan pequenas goti\u00f1as de auga sobre o vaso. Por que? Porque \u00e1 superficie do vaso, m\u00e1is fr\u00eda, chega aire dos pulm\u00f3ns, m\u00e1is quente e cargado de auga: a auga condensa. O mesmo fen\u00f3meno ocorre cando botamos aire un d\u00eda fr\u00edo no inverno: notamos como se bot\u00e1ramos ‘fume’.<\/p>\n\n\n\n\n
<\/a><\/td>\n<\/tr>\n
Datos relativos a un episodio de n\u00e9boa reproducido no informe para o Ministerio de Fomento. O pk 546 (685 m s.n.m.) queda preto do punto m\u00e1is alto da autov\u00eda. A visibilidade (escala dereita, li\u00f1a azul) vese que var\u00eda r\u00e1pido dende m\u00e1is de 2 km a uns poucos m, con tres episodios de n\u00e9boa de case un d\u00eda enteiro cada un, e varios menores.<\/td>\n<\/tr>\n<\/tbody>\n<\/table>\n

Os d\u00edas que na costa temos unha zona anticicl\u00f3nica cara \u00f3 norte, enviando vento a unha temperatura media ou alta dende o mar (=con auga disolta, ainda que non se note por ter unha temperatura algo m\u00e1is alta que a necesaria para condensar en goti\u00f1as), o aire chega \u00e1 zona do Fiouco e vese forzado a subir para pasar \u00e1 outra beira das monta\u00f1as. \u00d3 subir, enfr\u00eda. \u00d3 enfriar, a auga cond\u00e9nsase e forma goti\u00f1as: a n\u00e9boa.<\/p>\n

O fen\u00f3meno vese favorecido porque o aire mari\u00f1o leva consigo pequenos grans de sal que favorecen a condensaci\u00f3n. O mesmo que pasa nos saleiros das nosas casas cando o sal se apelmaza porque colle auga do aire, h\u00famido.<\/p>\n

O mecanismo de formaci\u00f3n de n\u00e9boa (\u00f3 fin, unha nube a nivel de superficie) no Fiouco pode aproveitarse doutras condici\u00f3ns, pero segundo o estudo feito, tres de cada catro veces que se produce a n\u00e9boa ten esa causa. E seguir\u00e1 a tela. <\/p>\n

No mapa de embaixo vese o tramo da autov\u00eda afectado pola n\u00e9boa de xeito principal (continuar\u00eda un pouco m\u00e1is \u00e1 dereita, cara a Ribadeo). Xusto no centro est\u00e1 a curva onde se produciu o accidente en cadea, e un pouco m\u00e1s \u00e1 dereita est\u00e1 o punto m\u00e1is alto da autov\u00eda.<\/p>\n