ORDENADOR RAPEIRO
Con el rapeará en directo o cantante madrileño Bnet, desafiando así a intelixencia artificial, creada neste caso por un equipo de especialistas galegos afincados en Navarra e formado por directores de cinema, de fotografía e por artistas en 3D. Algúns dos seus membros (que xa contan tamén co seu duplo virtual para dar, por exemplo, conferencias e faladoiros) mesmo acadaron un Goya á mellor curtametraxe de animación, titulada Cafuné. O proxecto conta coa colaboración de Telefónica.
Esta batalla de galos ou rap “free style” (caracterizada pola rapidez e a agudeza verbais) poderase seguir polas redes sociais en tempo real. Para adestrar o seu xemelgo dixital, o rapeiro estivo rapeando con el durante varios meses sen parar. Ademais, empregou as súas propias cancións para retar a máquina e, ao mesmo tempo, adestrala. Este estilo musical está moi de moda, desde hai xa algúns anos, na América hispana caribeña e tamén nos EEUU, xénero no que triunfa o “spanglish” como elemento vehicular.
En Corea do Sur e Xapón xa hai tempo que os robots humanoides ou os hologramas teñen, entre outras, a profesión de cantantes, arrastrando milleiros de seareiros afervoados e converténdose en verdadeiros fenómenos de masas. Mesmo hai persoas (solitarias, misántropas e non sei se moi equilibradas) que namoraron da súa parella virtual e decidiron formalizar a relación até o punto de casar. Imaxino que será algo semellante ao que poida acontecer co agarimo que algúns humanos lle poidan ter a unha mascota, ao seu coche ou a un obxecto cun forte valor económico ou sentimental.
Non obstante, case todo está xa inventado. De feito, na bisbarra de Bergantiños, por exemplo, está moi viva aínda a tradición da regueifa, ese diálogo desafiante cantado e retranqueiro entre dous contrincantes que se pelexan verbalmente como se turran, durante a “berrea” os cervos. Non soa tan moderno, mais évos exactamente o mesmo.