Metarcade é un xogo nacido da primeira xuntanza de Godoteires, na Coruña. Eu levaba tempo con ganas de aprender un pouco máis de Godot, polo que fixen un pequeno xogo RPG de exemplo e din unha pequena charla sobre el. Está publicado en https://github.com/jsmtux/July_RPG.
Lucía (Ferro) ía vir comigo igual, así que a liei para facer unha charla tamén. Xa que ela é escritora tiña bastante que compartir sobre facer historias. Ademais de que xa levaba tempo a investigar sobre como a interactividade deste medio podía axudar a transmitir ideas. Quedaralle tamén unha charla moi chula https://www.youtube.com/watch?v=P6rBRN3mnVY.
Logo de tan exitoso encontro, decidimos facer un proxecto un pouco máis serio xuntos. Ao non dedicarnos a facer videoxogos, o plan que trazamos para o desenvolvemento debía adaptarse ao noso tempo libre.
Aínda que me podo manexar con Gimp, Inkscape ou Blender e fixen algun proxecto con eles, como as portadas dos libros de Lucía, non me vexo capaz de xerar todos os gráficos para un videoxogo completo. Xa que decidiramos facer algo en 3D, visitamos kenney.nl para ver que había dispoñible. Chamounos a atención un dos últimos, sobre un salón de arcade con diferentes máquinas. Facer un xogo nun salón de arcade ten de vantaxe que podemos usar moitos dos outros assets para as distintas salas temáticas.
Queriamos que a parte principal do xogo fose a narrativa, artellada a través de conversas cos diferentes personaxes do salón de arcade. A historia da protagonista comeza cando visita o salón por vez primeira buscando a unha amiga súa, que tardará en atopar. O resto de persoas do arcade si a coñecen, pero nuns casos non saberán moito e noutros non conversarán coa protagonista por non ser suficientemente boa xogando ás máquinas.
Polo momento decidimos que as máquinas ás que se xoga durante o xogo non sexan interactivas, senón que o resultado veña dado polo nivel ou diferentes habilidades que esta irá obtendo. Este é un punto de continua confrontación entre ambos, xa que ela prefire engadir algún tipo de interacción mentres o xogo descorre e eu que unha vez comezada a partida non se interactúe máis antes que unha mecánica chorras. Xa veremos.
O noso obxectivo inmediato era ter algo que presentar na seguinte xuntanza de Godoteires. Dende principios de ano eu dispuxen de moito tempo, polo que logo de discutir a idea xeral do que queriamos facer comecei programando a base tecnolóxica. A idea era ter o traballo o máis avanzado posible para que cando Lucía tivese a historia e conversas rematadas fose o máis rápido posible integrar todo o contido.
Non foi ata un par de días antes da xuntanza cando estivo a maior parte do contido rematado. É certo que algún día estivemos a traballar ata media noite, pero semella que toda a preparación que fixeramos pagou a pena e puidemos integrar todos os personaxes a tempo. Do que queríamos nun principio para esta primeira demo faltaron algunhas mecánicas extra que tiñamos ideadas e facer diferentes videoxogos para cada máquina de arcade, reutilizando un mesmo con diferentes graos de dificultade.
A demo do xogo podedes descargala para Android a través de https://jsmtux.itch.io/metarcade, e todo feedback será apreciado! Os videos das charlas subiranse á web de A industriosa, pero espero nas próximas semanas facer unha entrada sobre a miña. E en xeral de vez en cando subir un post a este blog sobre como continúa o desenvolvemento.